كل حاجة حلوة نهايتها وداع

اصعب حاجة فى الدنيا كلمة الوداع او الفراق 

اتعلمت فى حياتى اللى عدت ان نهاية كل علاقة حلوة وداع ولازم كل اللى بنحبهم هنسيبهم سواء برضانا او غصب عننا
يعنى,...

كنت بحب جدتى اوووووووى وكان ممكن اقعد معاها سنة او اكتر بعيد ان اسرتى وتقريبا هى اللى ربتنى  .
كان اصعب حاجة ان يوم وفاتها مكنتش موجودة بس فاكرة اخر مكالمة ليها معايا قالتلى (اللقا نصيب) كلمة صعبه اوى انا اتاخرت ومشفتهاش بسبب الدراسة فى الكلية وسفرى وبعدها مبقتش عاوزة اذاكر وكنت دايما حاسة ان الل حرمنى من انى اودعها هى الدراسة وفعلا دبلرت السنة دى
وقتها بقى عرفت ان كل حاجة نهايتها فراق
لما رحت الكليه اول سنة سبت صحابى اللى فى الثانوى وسبت صحبتى الانتيم والوحيدة فى حياتى وبسبب بردوا بسبب الدراسة والسفر وهى بقت فى بلد تانى بدات المشاكل اللى تقريبا خلتنى ابقى لوحدى بدون صحاب
بعد ما جدتى توفت وصحبتى علاقتى بيها بقت مش كويسة خليت حياتى كلها سطحية خلاص اغلى اتنين مش معايا فملهاش لازمة العلاقات ومش هبقى قد انى اودع حد تانى من حياتى
بس رغم ان كانت علاقتى سطحية وهزليه بكل اللى فى الجامعة او فى السكن الا انى دلوقت بفتقد للناس دى اوى واى وسيلة اتصال مبقتش تغنى عن وجودهم فى يومى بصورة دايما سنين يعنى بردوا حسيت ان حتى العلاقات السطحية كلمة وداع فيها بتوجع اوى
كدا انا عشت طفولة فى مكان مع ناس فارقتهم وحياة جامعية مع ناس فارقتهم وللاسف اتنقلت لمكان تالت اكيد هيكون فى كلمة وداع جديدة لان فى النهاية الحياة كلها وداع